'Dylai'r Prif Weinidog gywiro datganiadau camarweiniol ar ddeintyddiaeth' - AS Plaid Cymru

Mae AS Gogledd Cymru Plaid Cymru wedi galw ar i'rr Prif Weinidog gywiro datganiadau a wnaed i'r Senedd ynghylch gwasanaethau deintyddol.

Mae Llyr AS Gruffydd eisiau i'r Prif Weinidog Eluned Morgan ymddiheuro i ddeintyddion ar ôl datganiadau camarweiniol i gwestiynau a gododd mewn cyfarfod diweddar o Bwyllgor Craffu ar y Prif Weinidog yn y Senedd.

Dywedodd Mr Gruffydd: “Mae llythyr damniol gan gadeirydd Cymru Cymdeithas Deintyddol Prydain yn ei gwneud yn glir bod y Prif Weinidog wedi camarwain y Senedd ar dri mater hollbwysig ynghylch deintyddiaeth yng Nghymru.

“Yn gyntaf, mewn ymateb i gwestiwn a ofynnais y mis diwethaf, honnodd fod deintyddion wedi derbyn codiad ariannol mwy na meddygon teulu. Mae'r BDA wedi egluro bod meddygon teulu wedi derbyn 11% tra bod deintyddion wedi cael 6%. Dywed deintyddion nad oedd hyn yn ddigonol i ddelio a chwyddiant uchel a chynnydd sylweddol yng nghostau rhedeg practisau.

“Yn ail, mae hi hefyd yn honni bod canllawiau NICE yn nodi mai dim ond bob dwy flynedd y mae angen i bobl â dannedd iach weld eu deintydd. Canllawiau yn unig yw hyn ac mae'r BDA, sy'n cynrychioli deintyddion, yn ei gwneud yn glir mai 24 mis yw'r cyfnod eithaf a bod angen gweld plant yn arbennig yn llawer amlach. Nid yw datganiad y Prif Weinidog yn ystyried mathau eraill o glefyd y geg y mae deintyddion yn eu trin yn rheolaidd, gan gynnwys clefyd peridontol neu ffactorau risg ar gyfer clefyd. Efallai y bydd angen cyfnod galw-yn-ôl o dri mis ar glaf â dannedd iach ond efo clefyd periodontol.

“Yn olaf, nid oes prinder deintyddion yng Nghymru - y broblem yw eu recriwtio i weithio o fewn y GIG. Mae hynny'n fater o gyllid ac amodau gwaith gwell. Mae'r Llywodraeth Lafur yma wedi methu'n llwyr â gwneud i'r system weithio i gleifion a deintyddion, gan arwain at nifer cynyddol o ddeintyddion yn gadael y GIG.

“Dylai’r Prif Weinidog gywilyddu am gamarwain y Senedd a’r cyhoedd yn fwriadol ynglŷn â’r argyfwng yr ydym yn ei wynebu ym maes deintyddiaeth y GIG. Yn hytrach na lledu anwireddau, mae angen iddi gywiro’r cofnod ac ymddiheuro i’r BDA a phawb arall sy’n gweithio ym maes deintyddiaeth yng Nghymru.”

Mae Mr Gruffydd wedi ysgrifennu at y Prif Weinidog ac at y Llywydd Elin Jones i ofyn i’r Prif Weinidog gywiro’r cofnod yng ngoleuni llythyr y BDA [gweler isod]