Llyr Gruffydd AS Aelod o'r Senedd dros Ogledd Cymru

Tanlinellodd Llyr Gruffydd AS bwysigrwydd economaidd Ystâd Ddiwydiannol Glannau Dyfrdwy, lle mae TATA Steel yn gyflogwr o'r radd flaenaf. Anogodd Lywodraeth Cymru a'r DU i wneud mwy i gefnogi'r diwydiant.
"Mae Ystâd Ddiwydiannol Glannau Dyfrdwy yn ased economaidd enfawr i Ogledd Cymru, ac mae TATA Steel yn rhan hanfodol o hynny. Byddwn ni ym Mhlaid Cymru yn gwneud ein gorau, nid yn unig i ddiogelu gweithfeydd fel Shotton ond i sicrhau eu bod yn ffynnu.
 
"Mae gan TATA Steel bresenoldeb enfawr yng Nghymru o hyd, ac mae'n rhaid i Gaerdydd a San Steffan wneud popeth posibl i ddiogelu'r diwydiant. Mae cymunedau ar draws Cymru yn dibynnu ar sector dur ffyniannus."

Mae arweinydd Plaid Cymru, Rhun ap Iorwerth AS, wedi disgrifio ffatri Shotton Tata Steel fel "pluen yn het" y diwydiant dur Cymru, gan bwysleisio ei rôl bwysig wrth gynnal cynhyrchu dur ledled y wlad.
Yn ystod ymweliad â safle Glannau Dyfrdwy, cafodd Rhun ap Iorwerth, Llyr Gruffydd AS, a Luke Fletcher AS (llefarydd Plaid Cymru ar yr economi) gipolwg ar weithrediadau'r ffatri a'i arwyddocâd o fewn rhwydwaith dur TATA yn y DU.
 
Mae safle Shotton yn cyflogi 800 o bobl ac yn arbenigo mewn ychwanegu haenau i gynhyrchion dur amrwd o ffatrïoedd eraill cyn eu cludo yn uniongyrchol i ddefnyddwyr.

Mae'r haenau hyn - fel galfaneiddio sinc a haenau lliw—yn cynyddu gwerth y dur yn sylweddol, gan wneud Shotton yn safle allweddol yng ngweithrediadau TATA yn y DU.

Wrth siarad wedi'r ymweliad, pwysleisiodd Rhun ap Iorwerth fod y gwaith yn rhan hanfodol o weithrediadau Tata Steel a diwydiant ehangach Cymru.
 
"Mae safle Shotton yn unigryw o fewn gweithrediadau TATA yn y DU—dyma'r safle sy'n ychwanegu gwerth go iawn i'w gynnyrch dur. Mae'n rhan hanfodol o weithrediadau'r cwmni—heb y safle hwn a'i weithlu, ni fyddai gweithrediadau dur TATA yn y DU yn goroesi.
"Mae cefnogi cyflogwr fel TATA yng Ngogledd-ddwyrain Cymru yn hanfodol, nid yn unig i'r rhanbarth ond i'r diwydiant dur ehangach yng Nghymru. Heb ffatri Shotton, ni all y gweithrediadau ym Mhort Talbot a Throstre ffynnu, a heb gyflenwi deunyddiau o'r gweithfeydd eraill yng Nghymru, ni all Shotton oroesi."