Llyr Gruffydd AS Aelod o'r Senedd dros Ogledd Cymru

Mae AS wedi croesawu y “newyddion gwych” bod contractydd newydd wedi cael ei benodi i redeg meddygfa yn Nyffryn Conwy.

Dywedodd Llŷr Gruffydd, sydd yn cynrychioli Gogledd Cymru yn y Senedd, ei fod yn gobeithio y bydd y datblygiad yn “calonogi trigolion lleol” sydd yn defnyddio Meddygfa Betws y Coed.

Heb gontractydd newydd yn ei le ar ôl i ddoctoriaid yn Meddygfa Betws y Coed ddod a’u cytundeb i ben ym mis Ebrill 2024, byddai nifer o drigolion yn gwynebu taith dwy ffordd o 36 milltir i weld meddyg teulu

Yn dilyn yr cyhoeddiad yna gwnaeth Llyr Gruffydd AS, Cynghorydd Sir Conwy Liz Roberts a chynrychiolwyr Llais Gogledd Cymru a Chyngor Cymuned Betws y Coed, gynnal cyfarfod cyhoeddus gyda uwch benaethiaid Bwrdd Iechyd Prifysgol Betsi Cadwaladr (BIPBC).

Yn dilyn y cyfarfod dywedodd y bwrdd iechyd ei fod wedi cael ymateb cadarnhaol 'r tendr oedd yn ceisio Contractwyr GMS newydd i ymgymryd â'r gwasanaeth meddygon teulu a dosbarthu meddyginiaeth ym Metws y Coed. 

Erbyn hyn mae BIPBC wedi cadarnhau bod contractydd newydd wedi cael ei apwyntio i gymryd y practis drosodd.

Dywedodd Llyr Gruffydd AS: “Rydw i yn hapus iawn i glywed y newyddion gwych bod Bwrdd Iechyd Prifysgol Betsi Cadwaladr wedi llwyddo i benodi contractydd newydd i redeg practis Meddygfa Betws y Coed.

“Rydw i yn gobeithio y bydd yn newyddion yn calonogi trigolion lleol a oedd wrth rheswm yn pryderu ar ôl clywed bod doctoriaid yn Meddygfa Betws y Coed yn dod a’u cytundeb i ben ym mis Ebrill 2024.

“Pan glywais bod y cytundeb yn dod i ben galwais am o leiaf yr un lefel o wasanaeth i gael ei gynnal a rŵan mae’n edrych fel dyna fydd yn digwydd.

“Rydw i yn deall bod yna broses yn ei le nawr i sicrhau bod yr holl waith llywodraethu a gwaith papur cyfreithiol ar waith ac yna bydd y bwrdd iechyd mewn sefyllfa i rannu mwy o wybodaeth.

“Rydw i hefyd yn deall bod staff yn y practis wedi cael eu hysbysu ac yn ymwybodol o'r sefyllfa hon.”

Ychwanegodd: ”Roedd y gwaith sydd wedi cael ei wneud gan Llais Gogledd Cymru i drefnu y cyfarfod cyhoeddus ar y cyd gyda cynghorydd lleol Liz Roberts yn o gystal a’r gymuned ehangach yn bwysig er mwyn amlygu faint mor ddifrifol oedd y sefyllfa. Roeddwn i hefyd wedi fy nghalonogi gan barodrwydd prif weithredwr BIPBC Carol Shillabeer a’r cadeirydd Dyfed Edwards i ddod i’r cyfarfod i esbonio eu safbwynt.

“Rydw i yn gobeithio y bod hyn yn fan cychwyn ar gyfer partneriaeth newydd rhwng y bwrdd iechyd a cymunedau ar draws y Gogledd y bydd yn arwain at gleifion yn cael gwasanaeth gwell.”