Llyr Gruffydd AS Aelod o'r Senedd dros Ogledd Cymru

Mae gwallau cyfieithu’r Gymraeg gan gyrff cyhoeddus yn “cael eu goddef yn rhy aml o lawer”, meddai AS.

Cododd Llyr Gruffydd, sy’n cynrychioli Gogledd Cymru, y mater gyda Gweinidog y Gymraeg, Jeremy Miles, yn dilyn camgymeriadau amlwg diweddar gan Lywodraeth y DU.

Dywedodd Mr Gruffydd, o Blaid Cymru, bod gwallau o‘r fath yn “anfon neges anffodus iawn o safbwynt statws y Gymraeg."

Gofynnodd i’r Gweinidog i ysgrifennu at Lywodraeth y DU i godi’r mater. Cytunodd Mr Miles i wneud hynny.

Daeth un gwall ieithyddol amlwg ar wefan y Swyddfa Gartref i’r golwg yn ddiweddar ar ôl cael ei rannu yn eang ar y cyfryngau cymdeithasol.

Mae canllawiau'r adran ar gyfer seremonïau dinasyddiaeth, sef y rhan olaf o ddod yn ddinesydd Prydeinig, yn cynnwys llw teyrngarwch "yn rhegi i Dduw Omnipotent". Mae hyn yn gamgyfieithiad o "swear" a dylai ddarllen yn “tyngu i Dduw hollalluog”.

Daeth enghraifft pellach o wall sillafu difrifol i’r golwg mewn prawf rhybudd argyfwng fis diwethaf.

Fe wnaeth Llywodraeth y Deyrnas Unedig ddweud mai problem dechnegol wnaeth achosi hyn.

"Mewn argyfwng go iawn, dilynwch y cyfarwyddiadau yn y rhybudd i'ch cadw chi ac eraill yn Vogel," meddai'r neges.

Dylai'r neges fod wedi dweud: "Yn ddiogel"

Dywedodd Llyr Gruffydd AS: “Mae pawb yn gweld enghreifftiau—rhai efallai’n fwy anffodus na’i gilydd—o gam-gyfieithu neu gamsillafu o bryd i’w gilydd.

“Maen nhw’n ddoniol, efallai, ar yr olwg gyntaf, ond mae nhw’n anfon neges anffodus iawn o safbwynt statws y Gymraeg, pan ein bod ni’n gweld enghreifftiau fel hyn yn cael eu goddef yn rhy aml o lawer.

“Mi welonm ni ymarferiad y neges destun gan Lywodraeth y Deyrnas Unedig yn honni mai’r bwriad oedd ein cadw ni’n 'vogel' yn lle’n ddiogel.

“Rŷm ni hefyd wedi gweld gwefan Llywodraeth y Deyrnas Unedig yn ein hannog ni i regi i Dduw omnipotent, yn hytrach na thyngu llw i Dduw hollalluog.

“Ond dydw i ddim jest yn pwyntio bys at Lywodraeth y Deyrnas Unedig. Mae yna enghreifftiau anffodus yn digwydd ar draws y sector cyhoeddus.

“A wnewch chi felly, fel Llywodraeth, ysgrifennu at gyrff sector cyhoeddus yng Nghymru, jest i’w hannog a’u hatgoffa nhw o’u cyfrifoldeb yn hyn o beth, ac efallai cyfleu yr un neges i Lywodraeth y Deyrnas Unedig?”

Atebodd Mr Miles: “Rwy'n hapus iawn i wneud hynny, ac efallai petasai llai o bwyslais ar y cwyno yn erbyn enwi Bannau Brycheiniog, a mwy o bwyslais ar gywirdeb, efallai y byddem i gyd yn hapusach.”